Hátekjuskattur skekur Frakkland

Hollande Frakklandsforseti setti á tímabundinn hátekjuskatt sem nemur 75 prósent af tekjum þeirra sem fara yfir 160 milljónir tekjumark á ári. Þetta, að viðbættum eignaskatti og fleiru, hefur haft í för með sér að þúsundir franskra heimila hafa þurft að greiða hærri skatta en sem nemur árlegum tekjum. Þetta er nokkurt stökk frá því sem var þegar hægri maðurinn Nicolas Sarkozy setti þak á skatt við 50 prósent af heildartekjum.

Franska viðskiptablaðið Les Echos metur það sem svo að tólf þúsund heimili þurfi að borga meiri skatta en sem nemur tekjum. Þessi skattheimta hefur verið sögð ósanngjörn af franska stjórnlagaráðinu; sé í raun eignaupptaka.

Hátekjuskatturinn hefur fælt marga fræga milljónamæringa af landi brott, þeirra á meðal leikarann Gerard Depardieu, sem hefur verið í forsvari fyrir þá sem ósáttir eru. Mikla athygli vakti þegar hann gerði sig líklegan til að flytjast til Rússlands en hann og Pútín eru miklir mátar. Aðrir nefndir eru sem hugsanlegir landflótta menn eru svo ríkasti maður Evrópu, Bernard Arnault, sem talinn er hafa sótt um ríkisborgararétt í Belgíu og sjóntækjajöfurinn Alain Afflelou - sem sagðist fluttur til Bretlands til að greiða lægri skatta.