Merkel kennt um ófarir Þýskalands í Eurovision

Þjóðverjar hafa fundið skýringuna á því af hverju þeim gekk ekki betur í Eurovision um helgina en raun ber vitni. Þeir telja að Angelu Merkel, kanslara Þýskalands, sé um að kenna. Einungis fimm ríki af þeim 39 sem gáfu stig í keppninni gáfu Þjóðverjum einhver stig. Þýskaland hafnaði í 21. sæti af 26. Þýskaland fékk atkvæði frá Austurríki, Ísrael, Spáni, Albaníu og Sviss.

Merkel er vinsæl í Þýskalandi fyrir harðlínustefnu sína gagnvart ríkjum sem lent hafa í skuldakreppu, eins og Grikklandi, Spáni og fleiri ríkjum eins og bent er á í danska viðskiptablaðinu Börsen. Íbúar þessara ríkja hugsa Merkel hins vegar þegjandi þörfina og það þykir hafa komið niður á þátttakendum Þjóðverja í Eurovision.