Stjórnarflokkarnir endurskoða ekki EES

Norsk stjórnvöld munu ekki krefjast endurskoðunar EES-samningsins á næsta kjörtímabili haldi núverandi stjórnarmynstur áfram eftir kosningar í haust. Þetta segja forsvarsmenn stjórnarflokkanna þriggja, Verkamannaflokksins, Sósíalíska vinstriflokksins og Miðjuflokksins, rauðgræna samstarfsins svokallaða.

Málið hefur verið í umræðunni síðasta árið, en komst í hámæli undir lok síðustu viku þegar Martin Kolberg, þingmaður Verkamannaflokksins, sakaði hina tvo stjórnarflokkana um að grafa undan stjórnarsamstarfinu með því að ala á óvissu um framtíð EES-samningsins. Enn harðnaði svo umræðan um helgina þegar formaður norska alþýðusambandsins lýsti því yfir í ræðu að samninginn skyldi endurskoða og vinnumarkaðsmál tekin þar út.

Jens Stoltenberg forsætisráðherra sagði að endurskoðun kæmi ekki til greina.

„EES-samningurinn er einn af grundvöllum stjórnarsamstarfsins og það má ekki ríkja nein óvissa um það. Þess vegna verður ekki farið út í endurskoðun því að það getur skapað óvissu um samninginn, sem er mikilvægur fyrir Noreg og hefur legið til grundvallar frá upphafi þessa samstarfs."

Í kjölfarið lýstu forsvarsmenn hinna flokkanna því yfir að endurskoðun væri ekki til umræðu á næsta kjörtímabili, þar sem rauð-græna samstarfið væri í húfi.

Sumir stjórnarandstöðuflokkanna þrýsta á um endurskoðun, sem og ungliðahreyfingar Miðflokksins og Sósíalíska vinstri flokksins, sem lýstu yfir óánægju með óbilgirni Stoltenbergs.