Söngvari sveitarinnar var handtekinn

Þrír hafa verið handteknir vegna eldsvoðans á næturklúbbnum Kiss í háskólaborginni Santa Maria syðst í Brasilíu í fyrrinótt.

Í það minnsta 233 fórust í eldsvoðanum. Hinir handteknu eru einn af eigendum staðarins, yfirmaður öryggismála á staðnum og söngvari hljómsveitarinnar Gurizada Fandangueira, en eldurinn kviknaði út frá blysum og flugeldum sem liðsmenn hljómsveitarinnar kveiktu í uppi á sviði.

Leit stendur nú yfir að öðrum eiganda staðarins. Samkvæmt þarlendum fréttum mun öryggisvottorð næturklúbbsins hafa runnið út á síðasta ári. Þá er talið að um tvö þúsund manns hafi verið á staðnum, sem hefur einungis leyfi fyrir eitt þúsund gesti, aðfaranótt sunnudags þegar hörmungarnar átti sér stað. Verið var að fagna inngöngu nýnema í háskólann UFSM og kviknaði í eftir að Gurizada Fandangueira hafði leikið fimm lög.

Flestir hinna látnu voru á aldrinum sextán ára til tvítugs. Fimm meðlimir Gurizada Fandangueira komust undan eldinum en harmóníkuleikari sveitarinnar, Danilo Jacques, lést.