Landsliðsmaðurinn Birkir Bjarnason er orðinn leikmaður Pescara á Ítalíu. Jim Solbakken, umboðsmaður Birkis, staðfesti þetta í samtali við Vísi í dag.
Birkir var í láni hjá ítalska liðinu í vetur frá Standard Liege í Belgíu. Birki gekk vel en svo fór að Pescara féll úr efstu deild. Solbakken segir Pescara hafa haft forkaupsrétt á Birki.
„Pescara nýtti sér forkaupsréttinn," sagði Solbakken og staðfesti að kaupverðið væri rúm ein milljón evra eða rúmlega 160 milljónir íslenskra króna.
Birkir sagði í viðtali við Vísi á dögunum að hann hefði ekki mikinn áhuga á að spila í næstefstu deild á Ítalíu. Því er með öllu óvíst hvort Birkir verði áfram hjá ítalska liðinu.
„Ég er að vinna í nokkrum möguleikum núna. Við sjáum til hvað gerist. Í augnablikinu er hann leikmaður Pescara og þeir greiða laun hans," sagði Solbakken.
Birkir til Pescara fyrir rúmlega milljón evra
