Gleymdist í fangelsi - var nær dauða en lífi

Daniel Chong, háskólanemi í San Diego í Bandaríkjunum, hefur fengið hálfan milljarð íslenskra króna í skaðabætur frá stjórnvöldum í Bandaríkjunum eftir að hann var læstur inni í fangaklefa í fjóra daga án vatns né matar.

Í apríl í fyrra var Chong í heimsókn hjá kunningja sínum þegar lögreglan braut sér skyndilega leið inn í íbúðina. Þar fundust meðal annars 18 þúsund e-pillur, skotvopn og skotfæri.

Þegar á lögreglustöðina var komið áttuðu lögreglumennirnir sig á því að Chong var einungis gestur í húsinu og hafði ekkert með fíkniefnin eða skotvopnin að gera. Honum var tjáð að hann yrði ekki ákærður.

Og þá byrjaði ballið. Einhverra hluta vegna var hann settur inn í pínulítinn gluggalausan fangaklefa. Lögreglumaður sagði honum að doka við í klefanum í nokkrar mínútur og lokaði klefanum.

Þessar nokkrar mínútur urðu að fjórum dögum og enginn heimsótti hann. Þá fékk hann engan mat né vatn að drekka.

„Ég sat ekki þarna og þagði. Ég sparkaði í hurðina og öskraði. Ég tók skómreimarnar mínar og setti undir hurðina til að sýna fram á að ég væri þarna inni,“ segir Chong.

Þegar hann losnaði svo út úr klefanum var Chong í vægast sagt slæmu ásigkomulagi. Hann var nánar meðvitundarlaus. Hann hafði misst um 7 kíló og drukkið eigið þvag. Hann var kominn með nýrnabilun og var lagður inn á spítala í fimm daga.

Yfirmaður fíkniefnalögreglunnar (e.DEA) sagði í yfirlýsingu í maí að hann væri miður sín vegna atviksins. Talsmaður lögreglunnar staðfesti svo í gær að sátt hefði náðst í málinu um að greiða Chong 4 milljónir bandaríkjadala, tæplega hálfan milljarð íslenskra króna.

Chong segist ætla að halda áfram að stúdera viðskiptafræði og gerir ráð fyrir að kaupa hús fyrir foreldra sína.

Frétt BBC.