Fyrsta vopnaprentsmiðjan fundin

Lögreglan í Manchester hefur gert þrívíddarprentara upptækan sem talið er að hafi átt að nota í vopnaframleiðslu. Þetta kemur fram hjá fréttastofu Sky.

Þetta er í fyrsta skipti sem slíkt mál kemur upp, að sögn talsmanns lögreglunnar í Manchester.

Húsleit lögreglunnar var hluti af aðgerð gegn skipulagðri glæpastarfsemi. Meðal þess sem fannst voru skotfæri sem talið er að hafi verið búin til í prentaranum.

Frá því að þrívíddarprentararnir komu á markað hafa lögregluyfirvöld haft áhyggjur af því að þeir yrðu notaðir til vopnaframleiðslu. Með prenturunum er hægt að búa til byssur sem eru án allra málmhluta.