Tíu ökumenn ákærðir

Ákveðið hefur verið að ákæra tíu ökumenn lúxusbifreiða sem lentu í árekstri í desember 2011 fyrir glæfraakstur.

Alls voru það fjórtán bifreiðar sem lentu í árekstrinum í borginni Shimonoseki í Japan, en um var að ræða ökumenn á leið á sportbílasamkomu í Hírósíma.

Þar af voru átta Ferrari-bílar, þrír af tegundinni Mercedes-Benz og einn af Lamborghini sem gjöreyðilögðust í árekstrinum. Tjónið er talið hafa numið um 500 milljónum króna og var áreksturinn kallaður sá dýrasti í sögunni.

Enginn slasaðist þó alvarlega í árekstrinum, en ökuþórarnir, sem eru á aldrinum 38 til 61 árs, gætu þurft að punga út enn meiri peningum verði þeir sakfelldir. Eru þeir sagðir hafa ekið gáleysislega og langt yfir leyfilegum hámarkshraða.