Uppreisnarmenn leggja upp laupana

Bertrand Bisimwa, leiðtogi uppreisnarhópsins M23 í austanverðu Austur-Kongó, segir að samtökin muni nú leggja niður vopn, en reyna þess í stað að ná fram markmiðum sínum eftir pólitískum leiðum.

Stjórnarherinn í Kongó hafði áður lýst því yfir að fullnaðarsigur væri unninn á uppreisnarmönnum. Þeir hafi verið hraktir af öllum þeim svæðum, sem þeir höfðu náð á vald sitt.

Fyrir hálfu öðru ári hóf hópurinn vopnaða baráttu gegn stjórnarhernum, að eigin sögn vegna þess að stjórnin hafi ekki staðið við friðarsamkomulag.

Hópurinn hafði notið stuðnings frá Rúandastjórn, en úr þeim stuðningi hefur dregið verulega. Nýverið fékk stjórnarherinn í Kongó þrjú þúsund manna fjölþjóðalið frá Sameinuðu þjóðunum til liðs við sig, og virðist það hafa ráðið úrslitum í átökunum.

Fjölmargir aðrir uppreisnarhópar eiga þó enn í vopnuðu stríði á þessum slóðum.