Mannskaði í Moore

Að minnsta kosti 24 létust, þar á meðal sjö börn hið minnsta, þegar risavaxinn hvirfilbylur, einn sá öflugasti sem mælst hefur, gekk yfir bæinn Moore í úthverfi Oklahomaborgar í Bandaríkjunum í fyrrakvöld.

Vindhraðinn í bylnum mældist allt að 320 kílómetrar á klukkustund, sem jafngildir um 90 metrum á sekúndu, og hann varð allt að þriggja kílómetra breiður.

Meðal þess sem varð á vegi hans var Plaza Towers barnaskólinn sem varð rústir einar. Um 120 manns nutu aðhlynningar á sjúkrahúsum í gær á meðan björgunarsveitir og sjálfboðaliðar leituðu að eftirlifendum í rústunum og aðstoðuðu þá sem áttu um sárt að binda.

Frekara illviðri var í kortunum þótt það væri ekkert í líkingu við það sem yfir hafði gengið. Hvirfilbyljir eru algengir á þessum slóðum og hafa fjórir stórir hvirfilbyljir gengið yfir Moore á síðustu fimmtán árum.

Árið 1999 létust 48 manns í enn öflugri byl. Þar mældist vindstyrkur hærri en nokkru sinni hefur þekkst á jörðu niðri, um 142 metrar á sekúndu. Rétt tvö ár eru síðan 158 létu lífið í hvirfilbyl sem gekk yfir bæinn Joplin í Missouri-ríki, en það er mannskæðasti hvirfilbylur sem um getur í sögu Bandaríkjanna. thorgils@frettabladid.is