Fundu 900 ára gamlan hundaskít

Fornleifafræðingar í Óðinsvé komust í feitt á dögunum þegar þeir fundu 900 ára gamlan skít, sem talið er að hundur hafi skilið eftir sig.

Samkvæmt vefsíðu Politiken fundust hægðirnar nærri ráðhúsinu í Óðinsvé þar sem unnið er að fornleifauppgreftri.

Maria Elisabeth Lauridsen fornleifafræðingur er spennt yfir fundinum enda hefur skíturinn ekki steingerst þar sem talið er að hann hafi legið grafinn í súrefnissnauðu umhverfi í níu aldir.

Þetta þýðir á mannamáli að skíturinn sé enn dálítið ferskur. Og það sem meira er - enn má finna lykt af hægðunum.

Skíturinn verður því sendur við fyrsta tækifæri til rannsóknar og þá er jafnvel hægt að finna út hver síðasta máltíð hundsins var.