Hulunni svipt af alþjóðlegu glæpagengi

Þýska lögreglan hefur komið upp um alþjóðlegt glæpagengi sem sérhæfði sig í að falsa verk eftir þekkta rússneska framúrstefnulistamenn, en framúrstefna er betur þekkt undir heitinu avant-garde.  Græddu falsararnir margar milljónir evra á athæfi sínu samkvæmt yfirlýsingum lögreglu.

Alríkislögreglan sagði að hundrað lögreglumenn hefðu ráðist inn í heimili, fyrirtæki og listasöfn víðsvegar um landið í dag og í gær en það var lokahnykkurinn á rannsókninni sem hófst í desember á síðasta ári. Einnig voru gerðar húsleitir í Ísrael og Sviss.

Tveir menn, grunaðir um að vera leiðtogar gengisins, voru handteknir og settir í gæsluvarðhald. Eiga þeir að hafa framleitt og selt yfir 400 listaverk síðan 2005. Listaverkin voru titluð sem áður óþekkt verk eftir listamenn eins og Vasily Kandinsky og Kazimir Malevich.