Lögregla skoðar hvort hermaður hafi myrt Díönu og Dodi

Scotland Yard hefur nú til rannsóknar nýjar upplýsingar um andlát Díönu prinsessu og Dodi Al-Fayed árið 1997. Breskir miðlar segja frá því í dag að í upplýsingunum sé meðal annars haldið fram að breskur hermaður hafi staðið á bak við dauða þeirra.

Fyrri rannsóknir hafa útilokað að um hafi verið að ræða morð af yfirlögðu ráði, heldur hafi bílstjóri Díönu verið ölvaður og ekið allt og hratt.

Í yfirlýsingu frá Scotland Yard var tekið fram að rannsókn væri ekki hafin á ný, en verið væri að gaumgæfa þær og athuga hvort ástæða sé til að fara lengra í málið á grundvelli þeirra.

Talsmaður konungsfjölskyldunnar sagði að engin yfirlýsing myndi berast frá sonum Díönu, Vilhjálmi og Harry, en Mohamed al-Fayed, faðir Dodis, sem lengi hefur viljað meina að um morð hafi verið að ræða, sagðist munu fylgjast vel með framvindunni og bjóst við því að lögreglan myndi rannsaka upplýsingarnar til fullnustu.