Kysstust á verðlaunapallinum í mótmælaskyni

Tvær rússneskar frjálsíþróttakonur mótmæltu í dag, fyrir framan heiminn, löggjöf lands síns á móti samkynhneigðum með því að kyssast á verðlaunapallinum.

Konurnar, Kseniya Ryzhova og Tatyana Firova, unnu báðar til gullverðlauna í 400 metra boðhlaupi kvenna í dag. Þegar þær tóku við verðlaununum ásamt liðsfélögum sínum kysstust þær þar sem þær stóðu á verðlaunapallinum. Þrátt fyrir að slíkur koss sé viðurkenndari sem vináttuvottur í Rússlandi heldur en annars staðar í heiminum hefur hann verið túlkaður sem mótmæli gegn nýrri löggjöf í Rússlandi sem bannar það að fræða börn undir 18 ára aldri um samkynhneigð.

Sænski hástökkvarinn Emma Green-Tregaro sýndi samkynhneigðum í Rússlandi einnig stuðning sinn síðastliðinn fimmtudag þegar hún málaði neglur sínar í regnbogalitum. Seinna var hún látin vita að hún gæti gerst brotleg við hátternisreglur Alþjóðlegu Íþróttasamtakanna og því breytti hún litnum yfir í rautt „fyrir ástina“.