Fjórum bjargað úr dýflissu í Houston

Fjórir heimilislausir menn fundust í heimagerðum fangaklefum í bílskúr í borginni Houston í gær.

Mennirnir eru á aldrinum fimmtíu og fjögurra til sjötíu og níu ára og gátu þrír þeirra ekki gengið þegar lögreglumenn frelsuðu þá í gær. Þeir segjast hafa verið lokkaðir inn í húsið með loforðum um áfengi og sígarettur, verið teknir til fanga og neyddir til þess að afhenda mánaðarlegar örorkubætur sínar. Einn mannanna telur að hann hafi verið í skúrnum í tæp tíu ár.

Ein manneskja er í varðhaldi vegna málsins og rannsakar lögregla nú hvort fjórar konur sem einnig fundust í húsinu hafi einnig verið haldið nauðugum. Konurnar eru allar sagðar þroskaskertar, en um er að ræða ömmu, dóttur, barnabarn og eina konu til viðbótar.

Lögregla komst á snoðir um málið þegar nágranni varð var við mennina, og eru íbúar í hverfinu sagðir í losti yfir atburðinum. Lögreglumaður lét hafa eftir sér að aðbúnaður mannanna hefði verið ömurlegur og klefarnir minntu helst á dýflissur.