Eitt ár liðið frá voðaverkunum í Aurora

Það var á þessum degi á síðasta ári sem hinn tuttugu og fimm ára gamli James Holmes gekk inn í kvikmyndasal í smábænum Aurora í Coloradoríki í Bandaríkjunum þar sem kvikmyndin The Dark Knight Rises var sýnd, og skaut tólf manns til bana og særði sjötíu, marga alvarlega.

Eftirlifendur voðaverksins komu saman á samstöðufundi í almenningsgarði í Denver í gær og minntust þeirra sem létust í árásinni.

Harmleikurinn í Aurora og fjöldamorðið í grunnskólanum Sandy Hook í Connecticut nokkrum mánuðum seinna voru kveikjan að háværri umræðu um vopnalöggjöfina í Bandaríkjunum.

Á fundinum í Denver í gær sameinuðust aðstandendur og eftirlifendur í kröfu sinni um bætta löggjöf og að ráðamenn beiti sér í málinu. Málið er þó afar umdeilt í Bandaríkjunum. Þannig söfnuðust um hundrað stuðningsmenn núverandi vopnalaga saman í garðinum til að hampa sínum rétti. Margir voru klæddir appelsínugulum stuttermabolum, merktir Skotvopnasamtökum Bandaríkjanna.

Ofbeldisglæpir þar sem skotvopn koma við sögu eru tíðir í Bandaríkjunum. Þannig hafa rúmlega tvö þúsund og fimm hundruð manns látist í skotárásum í landinu frá áramótum.

Um helgina munu íbúar í Aurora minnast þeirra sem létust í kvikmyndinahúsinu. Borgaryfirvöld hafa skipulagt viðamikla dagskrá þar sem áhersla er lögð á samstöðu, uppbyggingu, list og tónlist.