John Kerry lofar að Íranar muni ekki öðlast kjarnavopn

John Kerry, utanríkisráðherra Bandaríkjanna, reyndi um helgina að sannfæra egypsk stjórnvöld um að Bandaríkin muni ekki leyfa að ráðist verði á landið. Ummæli Kerry hafa verið túlkuð sem viðvörun til íranskra stjórnvalda varðandi hernaðaríhlutun í löndum bandamanna Bandaríkjanna.

Hann minntist sérstaklega á Sádi-Arabíu, Sameinuðu arabísku furstadæmin, Katar, Jórdaníu, Egyptaland sem og önnur lönd, án þess að tilgreina hvaða lönd það væru nákvæmlega, sem lönd sem Bandaríkin muni vernda.

Talið er að Kerry hafi þar átt við Ísrael, helsta bandamann Bandaríkjanna í Miðausturlöndunum.

„Bandaríkjamenn verða til staðar til að verja vini sína og bandamenn,“ sagði Kerry við blaðamenn í Kaíró, en Egyptaland var fyrsti viðkomustaðurinn á ferðalagi hans um Miðausturlönd, Evrópu og Norður-Afríku.

Kerry yfirgaf Egyptaland á sunnudaginn og hélt til Sádi-Arabíu þar sem talið er að hann muni þurfa að lægja öldur sem hafa risið í stjórnartíð Baracks Obama.

Yfirvöld þar í landi hafa lýst óánægju sinni með að Bandaríkin hafi ekki fylgt eftir refsiaðgerðum gegn Bashar Al Assad Sýrlandsforseta og beitt hernaðarvaldi gegn Sýrlandsstjórn vegna notkunar þarlendra stjórnvalda á efnavopnum gegn eigin borgurum.

Kerry minntist á Sýrlandsmálið á blaðamannafundinum í Kaíró og reyndi að gera minna úr deiluefninu. Hann sagði nokkur lönd ekki deila sömu skoðun á aðferðum Bandaríkjanna í Sýrlandi.

„það má vera að deilur séu um aðferðir hér og þar,“ sagði Kerry, en bætti við að víðtæk samstaða væri um það markmið að enda átök og mynda bráðabirgðastjórn í Sýrlandi.

„Við deilum öll þeirri skoðun að markmiðið er að halda sýrlenska ríkinu saman og veita þjóðinni tækifæri til að ráða eigin framtíð.“

Þá bætti Kerry við að Bandaríkin myndu aldrei leyfa Íransstjórn að öðlast kjarnorkuvopn.

Ríkisstjórn Obama biðlar nú til þingsins að hægja á fyrirætlunum um refsiaðgerðir gegn Íransstjórn til þess að halda möguleika á sveigjanleika í samningaviðræðum Bandaríkjanna og Írans varðandi kjarnorkuáætlun Írana.

Nýjar samningaviðræður um kjarnorkuáætlunina hefjast í Genf á fimmtudag en þar munu þau fimm ríki sem eiga fast sæti í Öryggisráði Sameinuðu þjóðanna, auk Þjóðverja, funda með fulltrúum klerkastjórnarinnar.

„Íran mun ekki öðlast kjarnavopn. Það er loforð frá forseta Bandaríkjanna,“ sagði Kerry.