Hafna beiðni Snowden um sakaruppgjöf

Hvíta húsið og yfirmenn njósnanefnda í bandaríska þinginu segja að beiðni fyrrum NSA starfsmannins og uppljóstrarans, Edward Snowden, um sakaruppgjöf verði hafnað.

Dan Pfeiffer, ráðgjafi innan Hvíta hússins, segir að engin slík boð séu nú til umræðu innan Hvíta hússins. Hann sagði í samtali við fréttastofu ABC að Snowden ætti að snúa til Bandaríkjanna og horfast í augu við ákærur. Snowden hefur fengið tímabundið hæli í Rússlandi eftir að hafa uppljóstrað trúnaðarupplýsingum um persónunjósnir bandarísku þjóðaröryggisstofnunarinnar NSA.

Formenn njósnanefnd Bandaríkjaþings Dianne Feinstein og Mike Rogers, taka ekki vel í hugmyndir um sakaruppgjöf. Segir Rogers sakaruppgjöf vera hræðilega hugmynd og Feinstein tekur í sama streng. Snowden hafi brotið lögin, þegar hann hefði persónulega getað tilkynnt nefnd hennar um upplýsingarnar sem hann lak.