Endur sem Gordon Ramsey notar í foie gras lifa við þröngan kost, í eigin skít og ælu

Endurnar sem Gordon Ramsey notar til þess að matreiða foie gras eða andalifur á veitingastöðum sínum eru geymdar í pínulitlum búrum þar sem þær hafa ekkert pláss til að hreyfa sig. Þær eru margar hverjar með mikið af sárum og jafnvel með brotin nef.

Myndband sem er að finna á Daily Record, sýnir endurnar í búrunum hefur verið birt á vefsíðum víða um heim. Þeir sem berjast fyrir réttindum dýra segja aðstæður andanna með þeim verri sem sést hafi.  Á myndbandinu sjást endur sem eru að deyja eða jafnvel dánar.

Á myndbandinu sést hvernig öndunum er gefið að borða þannig að dælu er stungið ofan í kokið á þeim, þannig eru þær píndar til að borða mun meira en þær þurfa og geta. Lifrin getur þannig ekki unnið úr allri fitunni sem eru í fæðunni. Lifrin verður því tíu sinnum stærri en ella.

Dýralæknir sem horfði á myndbandið sagði að ef hið sama væri gert við gæludýr yrðu þau umsvifalaust tekin af eigendum sínum og eigendurnir jafnvel kærðir fyrir dýraníð.

Justin Kerswell talsmaður samtaka sem berjast fyrir réttindum dýra sagði að þetta væri hrein pynding á dýrum. Hann sagðist ekki geta ímyndað sér að Gordon Ramsey myndi dirfast til þess að verja þetta.

Hann segir að það sé ekki hægt að verja það siðferðislega að láta dýr lifa við þess konar eymd, í sínum eigin skít og sinni eigin ælu í þeim tilgangi einum að lifrin í þeim smakkist betur.

Eftir að myndbandið hefur verið gert opinbert hefur Gordon Ramsey ákveðið að hætta að versla við andabúið. Að sögn talsmanns hans að hann hefði ekki vitað af þessum slæma aðbúnaði andanna.