Langar vaktir í Líbanon

Í Dahieh, úthverfi Beirút í Líbanon sem er helsta vígi Hezbollah-samtakanna, er starfrækt ein af 45 sjúkrabílastöðvum í borginni. Vilhelm Gunnarsson, ljósmyndari Fréttablaðsins, fór nýlega með sjálfboðaliðum Rauða krossins á tólf klukkustunda langa vakt og myndaði það sem fyrir augu bar.

Á hverri vakt eru vanalega um tólf sjálfboðaliðar.

Sumir sjálfboðaliðanna eru í fullu starfi og manna sjúkrabílana kvöld og nætur. Í sjúkrabílastöðvunum eru svefnherbergi fyrir karla og konur og þar geta sjálfboðaliðarnir hvílt sig í kojum milli útkalla.

Stöðin í Dahieh hýsir alls sex sjúkrabíla og auk þess stjórnstöð fyrir höfuðstöðvarnar. 

Sjálfboðaliðar Rauða krossins í Beirút eru alls 2.700 á 45 sjúkrabílastöðvum. Þeir þurfa að vera orðnir sautján ára, vera við góða heilsu og samsama sig hugsjónum Rauða krossins. Þeim er einnig óheimilt að taka þátt í stjórnmálum á nokkurn hátt.