Svona myndi venjuleg Barbie-dúkka líta út

Bandaríski listamaðurinn Nickolay Lamm hefur hannað Barbie-dúkku eftir málum hinnar venjulegu bandarísku konu. Hann segir dúkkurnar gefa stúlkum ranga mynd af kvenlíkamanum.

 „Ég hef lesið rannsóknir sem sýna fram á að Barbie, eins og hún lítur út í dag, hefur neikvæð áhrif á þá ímynd sem stúlkur hafa um sinn eigin líkama. Þegar þær leika með dúkkurnar hugsa þær: „Svona langar mig að líta út.“ Þær bera sig saman við Barbie,“ segir Nickolay í samtali við Berlingske.

Listamaðurinn tók saman meðaltal af hæð, þyngd, brjóstmáli og mitti bandarískra stúlkna og hannaði dúkku eftir málunum.

Barbie-dúkkan er 54 ára og er eitt þekktasta leikfangið í heiminum í dag. Samkvæmt Mattel, framleiðanda Barbie, eiga 90% af stúlkum á aldrinum 3-10 ára að minnsta kosti eina Barbie-dúkku. „Barbie er heimsfræg. Ég vissi að ef ég myndi hanna hana í eðlilegri stærð myndi fólk bregðast við um leið,“ sagði listamaðurinn.