"Það stafar mikil ógn af þessum fellibyl“

Fellibylurinn Haiyan gengur yfir Filippseyjar í nótt, en óveðrið er það mesta sem mælst hefur á jörðinni á þessu ári. Búast má við að vindhviður geti farið upp í 370 kílómetra á klukkustund.

Fellibylurinn er 5 stig, sem er það mesta í styrktarflokki fellibylja.

Benigno S. Aquino, forseti Filippseyja, varaði íbúa landsins í dag við óveðrinu, og sagði að margir mættu búast við miklum hörmungum næstu daga.

„Það stafar mikil ógn af þessum fellibyl, við getum dregið úr og minnkað afleiðingar af honum ef við miðlum upplýsingum á milli okkar til að undirbúa okkur,“ sagði hann. 

Búið er að koma upp hjálparbúðum, og þá er herinn í landinu einnig í viðbragðsstöðu.