Dómari gifti morðingja að dómsuppkvaðningu lokinni

Fjölskylda Kevins Santos, sem myrtur var árið 2003, krefst afsökunarbeiðni frá dómaranum Patriciu Cookson sem gifti morðingja hans nokkrum mínútum eftir að hún dæmdi hann í lífstíðarfangelsi.

Dómsuppkvaðningin var þann 17. september í San Diego-borg Bandaríkjanna og hafði unnusta Dannes Desbrow óskað eftir því að dómarinn gæfi parið saman að dómsuppkvaðningu lokinni. Cookson varð við þeirri bón, og gerði gott betur með því að baka köku fyrir hjónin.

„Að framkvæma athöfnina sýndi fram á hlutdrægni, morðingjanum í vil, og var tillitslaust í garð aðstandenda hins látna,“ sagði í bréfi fjölskyldu Santos. „Þetta var einfaldlega rangt,“ segir systir Santos. „Þetta var ekki dagurinn hans. Þetta var okkar dagur, og dagur Kevins.“

Cookson vildi ekki tjá sig um málið við fréttastofu AP.