Útlitið afar slæmt á Filippseyjum

Hjálparstarfsmenn á Filippseyjum sem aðstoða nú fólk við að takast á við afleiðingar fellibylsins Hayian, segja ástandið enn afar slæmt og útlitið ekki gott. Talsmaður samtakanna Læknar án landamæra segir afar erfitt að skipuleggja hjálparstarfið og koma hjálpargögnum á þá staði sem mest þurfa á þeim að halda, sérstaklega á einangruðum eyjum.

Í borginni Tacloban, sem einna verst varð úti, berast þó fregnir af því að hjálpargögn séu farin að berast með bandarískum herþyrlum en flugmóðurskipið George Washington kom til eyjanna í gær.

Opinber tala látinna stendur nú í 3400 manns en óttast er að sú tala eigi eftir að hækka.