Votta Chavez virðingu sína

Barack Obama, forseti Bandaríkjanna, og Ban Ki-moon, ritari Sameinuðu þjóðanna, hafa vottað fjölskyldu Hugo Chavez og öðrum í Venesúela virðingu sína.

Hugo Chavez lét lífið í dag eftir tveggja ára baráttu við krabbamein. Í tilkynningu sem varaforseti landsins sendi frá sér í dag kom fram að Chavez berðist fyrir lífi sínu. Þeirri baráttu lauk í kvöld.

„Á þessari erfiðu stundu fyrir íbúa Venesúela ítreka Bandaríkin stuðning sinn við íbúa landsins og áhuga sínum að auka uppbyggilegt samstarf við ríkisstjórn landsins," segir í yfirlýsingu frá Barack Obama.

„Nú, þegar nýr kafli er hafinn í sögu Venesúela styðja Bandaríkin stefnu sem lúta að lýðræðislegum gildum, lögum og virðingu fyrir mannréttindum," segir ennfremur í yfirlýsingunni.

Þá sendi Ban Ki-moon, ritari Sameinuðu þjóðanna, samúðarkveðjur til fjölskyldu forsetans, íbúa landsins og ríkisstjórnarinnar.

Dilma Rousseff, forseti Brasilíu, minntist einnig  leiðtoga granna sinna. Allir í Mið- og Suður-Ameríku ættu að syrgja Chavez. „Hugo Chavez var án nokkurs vafa leiðtogi sem þjónaði löndum sínum og öðrum íbúum Suður-Ameríku."

Nánar um viðbrögð ráðamanna við andláti Chavez á fréttavef BBC.