Valsmenn drógu tilboð sitt til Jóhannesar Karls til baka

„Við erum ekkert að vesenast í honum lengur,“ segir Börkur Edvardsson, formaður Knattspyrnudeildar Vals, um áhuga félagsins á Jóhannesi Karli Guðjónssyni. Miðjumaðurinn hefur verið orðaður við Fram og Val undanfarnar vikur eftir að ÍA sagði kappann til sölu.

„Við náðum samkomulagi við Skagamenn en drógum svo tilboð okkar til hans til baka,“ segir Börkur. Hann segir Jóhannes Karl hafa átt í erfiðleikum með að gera upp hug sinn og Valsmenn því hætt við tilboð sitt. „Það var samt allt í góðu.“

Sveinn Einarsson, kollegi Barkar hjá Fram, segist hafa heyrt í Jóhannesi Karli í síðustu viku. Þó sé ekki búið að ganga frá neinu. Hæg ættu heimatök Framara að vera enda Bjarni Guðjónsson, þjálfari Framara, bróðir Jóhannesar.

„Bjarni ætlar ekki að borga þannig að það lendir alltaf á okkur,“ segir Sverrir léttur. Framarar hafa verið í sérflokki á félagaskiptamarkaðnum í haust en hafa einbeitt sér að ungum og óþekktum leikmönnum.

„Okkur vantar svolítið kjöt í þetta,“ segir Sverrir. Hann reiknar með því að málin muni skýrast í vikunni.