Sigurður Ragnar: Of mikill munur á liðunum

Sigurður Ragnar Eyjólfsson var eðlilega ekki sáttur við 6-1 tap fyrir Svíum í Algarve-keppninni í Portúgal í kvöld. Þetta var stærsta tap liðsins undir stjórn Sigurðar Ragnars og stærsta tap kvennalandsliðsins í tæp þrettán ár.

„Það er hægt að nefna nokkrar ástæður fyrir þessu tapi en heilt yfir var munurinn á milli liðanna einfaldlega of mikill," sagði Sigurður Ragnar við Vísi í kvöld. „Svíar skoruðu mörk sem voru dæmd af vegna rangstöðu og Þóra bjargaði okkur nokkrum sinnum. Það stóð ekki steinn yfir steini hjá okkur í kvöld."

Sigurður Ragnar segir að það hafi verið ætlunin að mæta Svíum framarlega á vellinum í kvöld. Sú áætlun brugðist en staðan var orðin 4-0 í hálfleik. „Við hefðum átt að bregðast fyrr við því en við gerðum það í hálfleik. Síðari hálfleikurinn var örlítið betri hjá okkur en við töpuðum honum samt."

Sigurður Ragnar hefur áður gagnrýnt leikmenn sína fyrir að vera ekki í nógu góðu formi. Hann ítrakaði það í kvöld. „Stærsti munurinn á liðunum er líkamlegt form leikmanna. Við höfum spilað við Bandaríkin og Svíþjóð og bæði lið eru klassa fyrir ofan okkur hvað líkamlega þjálfun varðar."

„Við höfum rætt þetta við leikmenn en það eru þó auðvitað ekki allir leikmenn sem eru í lélegu standi - nokkrir eru í mjög góðu formi og hafa spilað vel í þessum leikjum. En of margir leikmenn eru eftir á."

„Það er ákveðið áhyggjuefni hversu langt við erum frá bestu liðunum. Þau eiga ekki að geta valtað yfir okkur eins og Svíar gerðu í dag. Við skulum ekki gleyma því að við unnum Svía á þessu móti fyrir tveimur árum síðan."

„Í dag spiluðum við illa. Við héldum boltanum ekki nógu vel innan liðsins og það vantaði hreyfingu án bolta. Við getum reynt að leita endalausra afsakana en ég ræddi við leikmenn eftir leik um að nú þyrfti hver og einasti að líta í eigin barm."

„Það eru enn tveir leikir eftir á þessu móti og nú þýðir ekkert volæði og engin sjálfsvorkun. Við verðum bara að gera betur í þeim."