Vargöld ríkir í undirheimum Danmerkur

Mikil óöld hefur ríkt í undirheimum Kaupmannahafnar þar sem glæpaklíkur takast á. Frá áramótum hafa tveir verið drepnir og margir hafa særst í fjölmörgum hnífa- og skotárásum.

Þetta eru mikil umskipti frá síðasta ári þegar klíkuátök voru í lágmarki, en vöxturinn er rakinn til þess að nokkrar minni klíkur í Kaupmannahöfn sameinuðust undir merkjum Loyal to Familia (LTF). Þeir hafa síðan troðið illsakir við Værebros Hårde Kerne (VHK) sem er tengd Vítisenglum, en þess utan hefur geisað stríð milli Black Cobras og Bandidos.

Stofnun LTF er rakin til þess að maður sem áður var í fararbroddi klíku einnar slapp úr fangelsi í nóvember og tók til við að sameina minni hópa gegn VHK. Það varð úr og nú telur LTF hátt í eitt hundrað meðlimi. Flestir þeirra eru af erlendu bergi brotnir en þó eru nokkrir af dönskum ættum þar á meðal.

Þessi vargöld síðustu mánuði hefur þó haft þau áhrif að ungir menn hafa flúið klíkurnar af ótta um að verða fórnarlömb í næstu árásum.