Vilja fá forseta Ítalíu sem vitni í mafíumáli

Ákæruvaldið á Ítalíu vill kalla hinn tæplega 88 ára gamla forseta landsins, Giorgio Napolitano, fyrir sem vitni í komandi dómsmáli um leynisamninga sem hið opinbera gerði við mafíuna á síðasta áratug síðustu aldar.

Málið snýst um að háttsettir embættismenn, stjórnmálamenn og yfirmenn í ítölsku lögreglunni hafi samið við mafíuna á Sikiley um að hún léti af morðherferð sinni á meginlandi Ítalíu sem hófst árið 1992. Í staðinn myndi hið opinbera sjá til þess að fangelsisdómar yfir um 300 meðlimum mafíunnar sem þá sátu inni yrðu styttir.

Á þessu ári sem hér um ræðir var Napolitano þingforseti fulltrúadeildar ítalska þingsins. Í frétt frá fréttastofunni dpa segir að dómstóll á Ítalíu hafi nú þessa beiðni til athugunar. Ekki liggur ljóst fyrir hvort fyrrgreint leynisamkomulag hafi nokkurn tíman öðlast gildi.

Morðherferðin var á vegum Corleonesi fjölskyldunnar og hófst í framhaldi af því að Salvatori Riina foringi hennar, oft kallaður Dýrið, var handtekinn. Í kjölfarið voru m.a. tveir þekktir saksóknarar sem börðust gegn mafíunni myrtir og vöktu þau morð heimsathygli.