Cristoph Waltz hljóp af sviði vegna skothvella

Christoph Waltz hljóp úr myndveri við tökur á frönskum spjallþætti í beinni útsendingu þegar tveir skothvellir heyrðust og úr áhorfendahópnum heyrðist kallað að hleypt hefði verið af byssu.

Tvöfaldi óskarsverðlaunahafinn var gestur í þættinum „The Grand Journal" í myndveri utandyra í tengslum við Cannes kvikmyndahátíðina þegar skothvellirnir heyrðust. Leikarinn og gestir þáttarins hlupu í skjól þegar einhver heyrðist segja „það er einhver að skjóta."

Samkvæmt fyrstu fregnum af málinu var talið að hleypt hefði verið af púðurskotum af manni sem sagðist vera með handsprengju undir höndum.

Þegar þátturinn hófst að nýju nokkrum mínútum seinna sagði þáttastjórnandinn að um púðurskot hefði verið að ræða.

Fréttamiðillinn Nice-Matin sagði að maður, sem var handtekinn í tengslum við málið, hefði haft undir höndum startbyssu, vasahníf og plasthandsprengju.

Atvikið er annað í röð glæpa sem skyggja á hátíðinni, en á aðfaranótt föstudagsins var skartgripum stolið á hátíðinni fyrir um milljón dollara.

Nánar um málið á vef Fox News.