Heimir minnti Lars á peningana

„Úrslitin eru það eina sem skiptir máli í fótbolta og þau segja okkur að við séum betri en Norðmenn,“ sagði Lars Lars Lagerbäck á blaðamannafundi landsliðsins í gær.

Sá sænski viðurkenndi að fyrri leikurinn í Reykjavík, þar sem Ísland vann 2-0 sigur, hafi verið jafn og hlutirnir fallið með strákunum okkar. Síðan hafa Íslendingar verið á flugi en Norðmenn í lægð. Þó megi ekki gleyma því að þeir norsku eru á heimavelli.

„Ef norsku leikmennirnir hugsa á svipuðum nótum og við þá vilja þeir sýna að þeir séu betri en þeir sýndu í Slóveníu.“ Leikurinn var sá fyrsti undir stjórn nýs landsliðsþjálfara, Per-Mathias Högmo, og lauk með 3-0 sigri Slóvena.

Lagerbäck var beðinn um að lýsa því hver væri helsti munurinn á að þjálfa íslenska liðið og það sænska sem hann gerði í rúman áratug.

„Aðallega ferðalögin,“ sagði landsliðsþjálfarinn léttur en bætti svo við að fjölmiðlaumhverfið væri vænna enda færri blaðamenn að störfum.

„Svo eru það peningarnir,“ skaut Heimir Hallgrímsson inn í og uppskar hlátur. Hvort Heimir átti við laun þess sænska eða takmarkaðra starfsumhverfi var erfitt að átta sig á. Lars tók hins vegar boltann á lofti.

„Þegar við fórum til Kýpur dvöldum við sex tíma á flugvellinum í London sem er ekki frábært fyrir landslið,“ sagði sá sænski og bætti við: „Það eru ekki margir í starfsliði okkar. Við höfum ekki aðstoðarmann við leikgreiningu. Heimir sér um alla slíka þætti og ég reyni að styðja við bakið á honum.

Leikurinn í kvöld verður í beinni textalýsingu á Vísi. Gummi Ben mun lýsa leiknum beint á Bylgjunni og verður hægt að hlusta á lýsinguna inn í textalýsingarfrétt Vísis. Textalýsing, tölfræði og Gummi Ben. Allt á sama stað í kvöld á Vísi.