Útfararstjórinn vildi losna við útlendingana | Myndband

„Ég hef verið svo lánsamur í gegnum tíðina. Þegar ég var að spila í gamla daga gat maður skipt um umhverfi og kúplað sig auðveldlegar frá en margur annar,“ segir Sverrir Einarsson, útfararstjóri og formaður knattspyrnudeildar Fram.

Sverrir, sem er fyrrverandi leikmaður Fram og hefur verið viðloðandi félagið í hátt í 30 ár, tók við formennsku hjá knattspyrnudeildinni í ágúst. Hann segir stjórnina hafa ákveðið strax að endursemja ekki við erlenda leikmenn félagsins.

„Þessi fjöldi af útlendingum þarf að styrkja liðið verulega mikið. Það þarf að útvega laun, íbúð og bíla. Það kostar heilmikinn pening,“ segir Sverrir í viðtali í kvöldfréttum Stöðvar 2.

Hann telur Framara geta fengið sömu gæði í íslenskum leikmönnum fyrir minni fjárhæð. Hann hafi heyrt af því að sumir erlendir leikmenn fái allt að 600 þúsund krónur í mánaðarlaun.

Fram seldi Hólmbert Aron Friðjónsson til Celtic á dögunum. Samkvæmt heimildum fréttastofu var söluverðið rúmar 20 milljónir króna. Sverrir segist ekki geta staðfest það. Í samningnum við Celtic hafi verið farið fram á trúnað um kaupverðið.

Aðspurður um vandamál Fram, sem halda úti starfi á tveimur stöðum á höfuðborgarsvæðinu, segir Sverrir:

„Það er oft talað um að Fram sé í krísu. Labbaðu inn í Framheimilið í dag og þá blasa við þrír af átta stærstu titlum sem í boði eru í handbolta og fótbolta kvenna á Íslandi.“

Vísar Sverrir í þá staðreynd að Framarar eru ríkjandi Íslandsmeistarar í bæði karla- og kvennaflokki í handbolta auk þess að vera bikarmeistari karla í knattspyrnu.