Gerrard líkir Jon Flanagan við Jamie Carragher

Steven Gerrard, fyrirliði Liverpool, var afar ánægður með frammistöðu hins tvítuga Jon Flanagan í 3-3 jafnteflinu á móti Everton í ensku úrvalsdeildinni um helgina en hægri bakvörðurinn fékk mikið hrós frá fyrirliða sínum.

„Stjarnan í okkar liði í þessum leik var án vafa Jon Flanagan. Hann fær ekki margar fyrirsagnir en ég var stoltastur af honum. Mér fannst hann vera ótrúlega góður," sagði Steven Gerrard við Liverpool Echo.

„Hann er búinn að leggja mikið á sig á æfingunum bara til að komast í hópinn hvað þá að ná inn í byrjunarliðið. Knattspyrnustjórinn henti honum út í djúpu laugina á móti toppleikmanni eins og Kevin Mirallas. Mér fannst hann standa sig stórkostlega," sagði Steven Gerrard.

„Þetta var ein besta frammistaða leikmanns í derby-leik í langan tíma. Jon Flanagan minnir mig að mörgu leyti á Jamie Carragher," sagði Gerrard.

„Hann er Liverpool-aðdáandi eins og ég sjálfur. Hann veit því hvað það þýðir að koma inn í svona leik og standa sig svona vel. Hann gerir sér fulla grein fyrir þýðingu þessa leiks enda strákur úr Liverpool-hverfinu. Allir leikmenn liðsins hrósuðu honum inn í klefa eftir leikinn. Hann var stórkostlegur," sagði Gerrard.

Það er hægt að sjá svipmyndir úr leiknum með því að smella hér fyrir ofan.