Íransviðræðum verði haldið áfram

Bandaríkjaþing undirbýr nú harðari refsiaðgerðir gegn Íran. Bæði demókratar og repúblikanar standa að þessu, þrátt fyrir að stjórn Baracks Obama forseta vilji bíða með frekari refsiaðgerðir meðan reynt er að ná samningum við Írani.

Um helgina lauk í Genf samningaviðræðum sex ríkja við Íran án þess að samningar tækjust, en Hassan Rúhaní Íransforseti leggur áherslu á að viðræður muni halda áfram.

John Kerry utanríkisráðherra Bandaríkjanna, segir að Íranir hafi á laugardaginn ekki „að sinni” getað fallist á tilboð ríkjanna sex, en samstaða hafi ríkt á meðal viðsemjanda Írans um tilboðið.

„Frakkar samþykktu það, við samþykktum það,” hefur AP fréttastofan eftir Kerry. 

Frakkar eru hins vegar sagðir hafa verið mun harðari í samningaviðræðunum við Íran en Bandaríkin. Þegar samningsdrög voru að mótast voru það Frakkar sem vöruðu við því að hugsanlega væri verið að ganga of langt í að koma til móts við Írani.

Ákveðið hefur verið að halda þessum viðræðum áfram áður en langt líður.

Það eru fastaríkin í öryggisráði Sameinuðu þjóðanna, nefnilega Bandaríkjamenn, Bretar, Frakkar, Kínverjar og Rússar, auk Þjóðverja og Evrópusambandsins, sem hafa átt í þessum viðræðum við Írana um kjarnorkumálin.

Deilurnar snúast um það hvort Íranir ætli sér eða hafi í það minnsta möguleika til nota kjarnorkuvinnslustöðvar sínar til þess að smíða sér kjarnoruvopn. Íranir fullyrða að þeir hafi ekkert slíkt í hyggju, en viðsemjendur þeirra vilja að þeim verði gert það ókleift.

Í gær kom Yukiya Amano, yfirmaður Alþjóðakjarnorkustofnunarinnar, svo til Írans til viðræðna um alþjóðlegt eftirlit með kjarnorkuáætlun Írans og betri aðgang að kjarnorkuvinnslustöðvum landsins.