Brasilískur maður grafinn lifandi

Brasilískur karlmaður slapp með skrekkinn eftir að hann var grafinn lifandi í kirkjugarði Ferraz de Vasconcelos-hverfisins í Sao Paulo.

Að sögn brasilískra fjölmiðla náði maðurinn athygli vegfaranda í kirkjugarðinum með hrópum og köllum, og sá vegfarandinn jarðveginn hreyfast ofan á manninum. Manninum var bjargað í kjölfarið en að sögn sjónvarpsstöðvarinnar Record TV á hann við geðræn vandamál að stríða.

Ekki er vitað hvernig maðurinn endaði í gröfinni en talinn er möguleiki á því að á hann hafi verið ráðist og hann grafinn í kjölfarið. Meiðsli hans voru ekki alvarleg og var hann útskrifaður af spítala samdægurs.