Herskip á leið til Filippseyja til aðstoðar

Bresk og Bandarísk herskip eru nú á leið til Filippseyja, hlaðin hjálpargögnum, til þess að taka þátt í björgunarstarfinu þar í landi eftir að fellibylurinn Hayian lagði þar stór landsvæði í rúst. Bandarískt flugmóðurskip er meðal annars á leið á svæðið auk bresks orrustuskips.

Að minnsta kosti tíu þúsund manns eru taldir af og þúsundir eru í bráðri þörf fyrir aðstoð. Forseti Filippseyja, Benigno Aquino hefur lýst yfir neyðarástandi en björgunarmenn hafa átt í erfiðleikum með að komast á þá staði sem verst urðu úti.

Ban Ki Moon framkvæmdastjóri Sameinuðu þjóðanna sagði í gærkvöldi að ástandið væri skelfilegt og að stofnunin hafi heitið 25 milljónum bandaríkjadala til að standa straum af kostnaði við bráða-hjálparstarfið.