Staða kvenna í arabaheiminum verst í Egyptalandi

Hvergi í arabaheiminum er staða kvenna verri en í Egyptalandi, ef marka má nýja könnun á réttindum kvenna í arabalöndunum.

Staða kvenna hefur reyndar versnað í löndum „arabíska vorsins” svonefnda, þar sem vonir höfðu vaknað um að byltingar myndu bæta ástandið.

Þá er staða kvenna í Írak verri nú en á tímum Saddams Husseins. Írak er í næst neðsta sætinu en Sádi-Arabíu í því þriðja neðsta.

Sýrland kemur svo næst í röðinni, þá Jemen, Súdan og Líbanon.

Í Sádi-Arabíu eru formleg réttindi kvenna einna minnst, en ástæða þess að Egyptaland lendir í neðsta sæti er útbreitt kynferðisofbeldi og áreitni, sem nánast hver einasta kona í Egyptalandi verður fyrir.

Smáríkið Comoros-eyjar stendur sig best hvað varðar stöðu og réttindi kvenna. Næstbest er ástandið í Oman og þar á eftir í Kúveit.