Egyptalandsstjórn hunsar dómsúrskurð

Útgöngubanni hefur ekki verið aflétt í Egyptalandi, þrátt fyrir að dómstóll í landinu hafi á þriðjudag kveðið upp þann úrskurð að það væri útrunnið.

Útgöngubann var sett á þann 14. ágúst, og átti þá að standa í mánuð, en var framlengt 12. september um tvo mánuði.

Stjórnin hefur litið svo á að það þýði að því eigi að ljúka 14. nóvember, en dómstóllinn komst að þeirri niðurstöðu að tveggja mánaða framlengingin hafi runnið út 12. nóvember.

Stjórn landsins virðist hafa áhyggjur af því að stuðningsmenn Múhameds Morsís, sem steypt var af forsetastóli í byrjun júlí, muni efna til fjöldamótmæla þegar bannið rennur út.

Morsi hefur setið í stofufangelsi frá því honum var steypt af stóli, en hefur nú í fyrsta sinn rætt ítarlega við lögfræðinga sína.

Lögfræðingarnir segja að í dag sendi Morsi frá sér yfirlýsingu, þar sem hann ávarpar egypsku þjóðina í fyrsta sinn frá því hann var hnepptur í varðhald.