Baldwin táraðist í réttarsalnum

Bandaríski leikarinn Alec Baldwin bar vitni gegn kanadískri konu í réttarhöldum í New York í gær. Konan, hin 41 árs gamla Genevieve Sabourin, er ákærð fyrir að sitja um leikarann og áreitni og hótanir af ýmsu tagi. Hún á yfir höfði sér allt að ársfangelsi verði hún sakfelld.

Sabourin er gefið að sök að hafa sent leikaranum tugi tölvupósta þar sem hún ýmist hótaði honum eða sagðist vilja vera eiginkona hans. Þrátt fyrir ítrekaðar beiðnir leikarans um að láta sig í friði sat konan um heimili hans í New York og elti hann á röndum.

Konan truflaði vitnisburði Baldwins og eiginkonu hans ítrekað og sakaði þau um lygar. Þá sagði hún að eiginkona Baldwins myndi fara til helvítis og hótaði dómarinn í kjölfarið að kæra Sabourin fyrir réttarspjöll. Lögmaður hennar fór þá með hana afsíðis til að reyna að róa hana niður.

Sabourin bar ekki vitni í gær en lögmaður hennar lagði fram tölvupóstsamskipti á milli hennar og leikarans til að sýna fram á að þau hafi staðið yfir um langt skeið, og með vilja leikarans. Baldwin segist hafa svarað bréfum Sabourin af kurteisi við vin sinn, kvikmyndaframleiðandann Martin Bregman, sem átti í ástarsambandi við hana um tíma.

„Ég átti aldrei frumkvæði að okkar samskiptum,“ sagði Baldwin í réttarsalnum, en hann virtist í miklu uppnámi og táraðist þegar Sabourin greip fram í fyrir honum með hrópum.