Höfin súrna hratt

Sýrustig heimshafanna er að aukast með meiri hraða en sést hefur í þrjúhundruð milljón ár. Þetta fullyrða vísindamenn í nýrri skýrslu sem kynnt verður á loftslagsráðstefnu sem haldin verður í Póllandi í næstu viku að því er segir á vef BBC.

Í skýrslunni er fullyrt að ef fram haldi sem horfi muni sjórinn hafa súrnað um 170 prósent árið 2100, frá því sem nú er. Afleiðingar þess yrðu skelfilegar en vísindamennirnir segja að þrjátíu prósent allra þeirra tegunda sem lifi í sjónum muni deyja út af þessum völdum.

Niðurstaða skýrslunnar er sú að auknum útblæstri koltvísírings, af mannavöldum, sé klárlega um að kenna.