ESB sátt við sölu Möltu á ríkisborgararétti

Framkvæmdastjórn Evrópusambandsins segir að Evrópudómstóllinn hafi ítrekað staðfest að ríki ráði því sjálf, hverjum þau veita ríkisborgararétt.

Evrópusambandið hafi því engan rétt til þess að koma í veg fyrir að Malta selji ríkisborgararétt sinn fyrir 650 þúsund evrur, eða ríflega hundrað milljónir króna.

Þingið á Möltu samþykkti á þriðjudag að ríkið geti selt auðugum einstaklingum ríkisborgararétt, en með þessu vonast smáríkið Malta til þess að afla sér beinharðra tekna upp á allt að 300 milljónir evra á ári.

Auk þess er vonast til þess að auðkýfingar sjái sér nú hag í að setjast að á Möltu, fjárfesti þar á báðar hendur og styrki efnahagslífið með ríkulegri einkaneyslu.

Stjórnarandstaðan hefur gagnrýnt þessi áform harðlega og heitir því að þegar hún kemst til valda á ný muni hún svipta alla, sem keypt hafa ríkisborgararétt með þessum hætti, þeim rétti.

Reglur Evrópusambandsins banna slíkt hins vegar ekki: „Aðildarríkin eru sjálfráð um að ákveða hverjum og með hvaða hætti þau veita ríkisborgararétt,” hefur veftímaritið EUobserver eftir Michele Cercone, talsmanni framkvæmdastjórnar ESB.