Kínastjórn boðar breytingar

Kínastjórn hefur ákveðið að landsmönnum verði heimilt að eignast fleiri en eitt barn. Einnig verður hið illræmda vinnubúðakerfi lagt niður.

Þetta var tilkynnt á þriðjudag, að loknu fjögurra daga fundi helstu leiðtoga kínverska Kommúnistaflokksins.

Þar voru teknar ákvarðanir um að Kínverjum verði brátt heimilt að eignast tvö börn, en þó með því skilyrði að annað foreldrið sé einbirni. Til þessa hefur pörum, giftum eða ógiftum, einungis verið heimilt að eignast eitt barn, með þeirri undantekningu þó að í sveitum hefur fólk mátt eignast annað barn ef fyrsta barnið er stúlka.

Vinnubúðunum, sem í orði kveðnu hafa snúist um „endurmenntun með vinnu”, var upphaflega komið á í þeim tilgangi að refsa þeim sem höfðu vogað sér að gagnrýna Kommúnistaflokkinn, en er nú einkum notað af valdamönnum í héruðum og sveitarfélögum, sem senda þangað einstaklinga sem draga völd þeirra í efa og gagnrýna spillingu.