Szczesny fékk nýjan samning

Wojciech Szczesny, markvörður Arsenal, hefur gert nýjan langtímasamning við Arsenal en félagið tilkynnti það í dag.

Szczesny er 23 ára gamall Pólverji sem hefur verið í herbúðum Lundúnarfélagsins síðan 2006.

„Ég er hæstánægður með nýja samninginn en Arsenal er eins og fjölskyldan mín. Ég er ánægður með að framtíð mín sé bundin við félagið,“ sagði hann í viðtali á heimasíðu Arsenal.

Eins og venja er hjá Arsenal er ekki gert opinbert hversu langur samningurinn er í árum.

„Ég hef alltaf haft þá trú að hann búi yfir miklum hæfileikum og hann getur enn orðið mun betri,“ sagði Arsene Wenger, stjóri Arsenal. „Hann getur verið mikilvægur hluti af Arsenal um ókomin ár.“