ESB þrýstir á Úkraínu

Úkraínustjórn virðist nú standa frammi fyrir því að þurfa að velja á milli Evrópusambandsins og Rússlands. 

Undir lok mánaðarins heldur Evrópusambandið leiðtogafund í Vilníu, höfuðborg Litháens, þar sem til stendur að undirrita samning við Úkraínu um stjórnmálatengsl og fríverslun.

Þar strandar hins vegar á því, hvort Úkraínustjórn samþykkir fyrst að leysa úr haldi Júlíu Tímosjenkó, fyrrverandi forsætisráðherra sem nú afplánar sjö ára fangelsisdóm vegna spillingarmála.

Mannréttindadómstóll Evrópu hefur komist að þeirri niðurstöðu að fangelsun hennar sé ólögmæt, og því krefst Evrópusambandið þess að meðal fjölmargra umbótamála, sem Úkraína þarf að leiða í lög áður en samningarnir verða undirritaðir, verði samþykkt lög sem tryggja að Tímósjenkó verði látin laus.

Úkraínuþing hafði frest þangað til í dag til þess að setja þessi lög, en ætlar nú að ræða þau á morgun.

Viktor Janúkovitsj, forseti Úkraínu, hefur lýst því vilja til þess að tengjast Evrópusambandinu, en hikar við að láta Tímosjenkó lausa.

Evrópusambandið hefur ákveðið að hinkra og sjá til hvort Úkraína klári þetta mál fyrir leiðtogafundinn í Litháen, sem haldinn verður dagana 28. og 29. nóvember.

Úkraína stendur hins vegar frammi fyrir því að verði samningarnir við Evrópu að veruleika muni Rússar að öllum líkindum snúa bakinu við Úkraínu.

Rússnesk stjórnvöld eru afar andsnúin því að Úkraína halli sér að Evrópusambandinu, og hafa hótað harkalegum aðgerðum sem myndu bitna á efnahagslífi Úkraínu. Meðal annars hafa Rúsar hótað því að flytja verksmiðjur frá Úkraínu til Rússlands.