Allt á suðupunkti í Miðafríkulýðveldinu

Það stefnir í borgarastríð í Miðafríkulýðveldinu, verði ekkert að gert. Þetta segir Ban Ki Moon framkvæmdastjóri Sameinuðu þjóðanna sem vill að stofnunin sendi friðargæslulið til landsins til að koma í veg fyrir að ofbeldið fari algjörlega úr böndunum.

Á fréttavef BBC segir að öngþveiti hafi ríkt í þessu fátæka Afríkuríki allt frá því uppreisnarmenn tóku völdin í mars síðastliðnum og steyptu forsetanum af stóli. Þrátt fyrir sveitir uppreisnarmanna hafi nú verið innlimaðar í stjórnarherinn hafa hlutar þeirra haldið áfram árásum á þorp víðsvegar um landið, með tilheyrandi blóðsúthellingum.