1.500 listaverk sem nasistar rændu fundin

Listaverkin 1.500 sem talið er að hafi verið gerð upptæk af Nasistum hafa fundist í München í Þýskalandi. Talið er að meðal verkana séu málverk eftir Matisse, Picasso, og Chagall. Frá þessu er sagt á vef BBC.

Ef fundurinn fæst staðfestur er hann einn stærsti listaverkafundur sögunnar. Rannsakendur telja að virði verkana séu um einn milljarður evra eða tæpir 164 milljarðar króna. Sum verkanna voru sögð vera „úrkynjuð“, á meðan öðrum var stolið eða listaverkasafnarar af gyðingaættum voru neyddir til að selja þau á smáaura. Nútímalist var að mestu bönnuð af nasistum fyrir að vera ó-þýsk eða fyrir að vera verk gyðinga.

Verkin munu hafa fundist snemma ársins 2011 þegar skattayfirvöld rannsökuðu Cornelius Gurlitt vegna skattsvika en hann er sonur listaverkasala í Munich. Þegar leitað var á heimili hans fundust um listaverkin sem höfðu horfið á valdatíma Nasista. Talið er að nasistar hafi lagt hald á um 16.000 listaverk á meðan þeir voru við völd.