Tölvuteiknaða stúlkan „Sweetie“ bendir lögreglu á kynferðisafbrotamenn

Alþjóðlegu barnaverndarsamtökin Terre des Hommes segjast hafa afhent lögreglu í Hollandi lista með nöfnum 1,000 barnaníðinga. Þessir menn voru staðnir að því að reyna að greiða fyrir kynferðislegt athæfi með tíu ára stúlkunni „Sweetie“ í gegnum vefmyndavél.

Sweetie er hins vegar ekki raunveruleg stúlka heldur einungis tölvuteiknuð mynd.

Samtökin sköpuðu Sweetie, sem líkir eftir filippínskri stúlku, til þess að góma kynferðisafbrotamenn. Henni var komið fyrir á spjallrásum á netinu og fékk fyrirspurnir um kynferðisgreiða  frá rúmlega 20,000 einstaklingum  á tíu vikum.

Talsmaður Terre des Hommes segir að með þessu hafi samtökin viljað vekja athygli á sívaxandi vandamáli. Sífellt fleiri sækja í kynferðislegt athæfi með börnum á netinu, sérstaklega í þróunarlöndum á borð við Filippseyjar.

Talið er að fórnarlömb þessara níðinga skipti tugþúsundum. Þó hafa aðeins sex einstaklingar í heiminum hlotið dóm fyrir afbrot af þessu tagi.