Sviku um 14 milljarða af debetkortum fólks

Lögregla í Quebec-héraði í Kanada, Frakklandi og Þýskalandi hefur með aðstoð netglæpadeildar Europol upprætt fjársvikahring sem svikið hefur um 14,4 milljarða króna út af debetkortum utan Kanada.

29 manns voru handteknir nú um mánaðamótin, sextán í Montrealborg og fimm öðrum bæjum í Quebec,  þeirra á meðal höfuðpaur glæpahringsins. Þrettán aðrir voru handteknir  í Þýskalandi og Frakklandi.

Svindlurunum tókst að komast yfir kortaupplýsingar um 30 þúsund debetkorta, miðla þeim til útlanda þar sem ný kort með upplýsingunum voru gefin út. Að meðaltali voru um 48 þúsund krónur teknar út af hverju korti.

Hundruð lögreglumanna tóku þátt í rannsókn málsins ásamt sérfræðingum banka í Kanada og Evrópu. Í tilkynningu frá Europol segir að alþjóðlegt rannsóknarkerfi stofnunarinnar við rannsókn netglæpa hafi komið að góðum notum við rannsóknina og átt sinn þátt í að rekja slóð svindlaranna.