Barilla lofar bót og betrun

Ítalski pastaframleiðandinn Barilla hefur snúið viðhorfi sínu í garð samkynhneigðra við í kjölfar mikillar reiði vegna ummæla forstjórans í september. Þar sagði Guido Barilla að fyrirtækið styddi við hina hefðbundnu fjölskyldugerð og að þeir sem væru því ósammála gætu keypt aðra pastategund.

Baráttufólk fyrir réttindum samkynhneigðra á Ítalíu tók ummælunum illa og var fólk hvatt til að sniðganga vörur fyrirtækisins. Í kjölfarið bað forstjórinn afsökunar á ummælunum.

Nú hefur fyrirtækið tilkynnt að það hafi skipað nefnd sem ætlað er að skerpa á jafnréttismálum innan fyrirtækisins. Þá mun fyrirtækið einnig fylgja jafnréttisstefnu mannréttindasamtakanna HRC, sem stendur vörð um réttindi hinsegin fólks á vinnumarkaðnum.

„Jafnréttismál eiga sér langa sögu innan fyrirtækisins, gildum þess og vinnureglna,“ segir Claudio Colzani, yfirmaður hjá Barilla. Að sama skapi viljum við stuðla enn frekar að fjölbreytni mannlífsins vegna þess að við teljum það vera rétt að gera.“

Einnig sagði fyrirtækið frá fyrirætlunum sínum um að halda keppni á næsta ári sem ætluð er að virkja almenning í jafnréttisbaráttunni. Þátttakendur munu senda inn stutt myndskeið sem eiga að endurspegla margþætta eiginleika pasta, og verða myndböndin dæmd af hópi sérfræðinga.

„Ef ég tala fyrir sjálfa mig þá hef ég ekki áhuga á að kaupa pasta þar sem hatursáróður fylgir með í kaupunum,“ sagði Anna Pála Sverrisdóttir, formaður Samtakanna 78, í samtali við Vísi í október.