Ísraelar andmæla Íranssamningi

Benjamín Netanjahú, forsætisráðherra Ísraels, er engan veginn sáttur við samning Vesturveldanna við Íran um kjarnorkumál.

Flest bendir til þess að samningaviðræðunum ljúki í Genf í dag. John Kerry, utanríkisráðherra Bandaríkjanna, er á leiðinni til Genf þar sem hann hittir meðal annars utanríkisráðherra Írans. Utanríkisráðherra Frakklands er sömuleiðis á leið til fundarins í Genf.

„Mér skilst að Íranir gangi nú um í Genf afskaplega ánægðir, eins og þeir ættu að vera því þeir hafa náð öllu sínu fram en ekki látið neitt af hendi,” segir Netanjahú. „Þetta er mjög lélegur samningur og Ísrael hafnar honum algerlega.”

Ísraelsstjórn hefur lengi haft horn í síðu Írans og óttast mjög að Íranir komi sér upp kjarnorkuvopnum.

Íranir hafa hins vegar staðið fast á því að þeir ætli sér eingöngu að nota kjarnorkuna í friðsamlegum tilgangi.

Hvorki Bandaríkjunum né Alþjóðakjarnorkumálastofnuninni hefur samt gengið neitt að fá Írana til samningaviðræðna um kjarnorkumál fyrr en Hassan Rúhani tók við forsetaembætti í sumar.

Rúhani hefur lagt mikla áherslu á að bæta samskiptin við Vesturlönd, þveröfugt við forvera sinn í embætti, Mahmúd Ahmadínedjad, sem virtist hafa óendanlega gaman af því að ögra Bandaríkjunum.